Перейти к содержимому


Фотография

Mübarizə Metodlarıİslami Hərəkatın bir bölümü


  • Mövzuya cavab vermək üçün, avtorizasiyadan keçməlisiniz.
Bu mövzudakı ismarıc sayı: 6

#1 Usuli

Usuli

    Forum Əhli

  • Moderators
  • 1.265 ismarıc
  • Məzhəb:Hənəfi

Yerləşdirilmə tarixi: 12 aprel 2014 - 16:45

بسم الله الرحمن الرحيم

 

Məqalə niyə qələmə alındı?

 

Mübarizə etmədən insan kimi yaşamanın qeyri mümkün olduğu dünyamızda, müsəlmanlar olaraq biz də bu prosesdə qaçınılmaz olaraq yer alırıq. Dünyanın bir çox yerində, müxtəlif sahələrdə, bir çox toplumun mübarizə üsullarını mütəmadi izləyən biri olaraq deyə bilərəm ki, bizim bu sahədə gedəcəyimiz yol çox uzundur...

Məsələn bu günlərdə demokratiya oyununun mahiyyətini çözə bilməmiş, vəziyyəti doğru dəyərləndirməkdən aciz olan “İxvanul Muslimin” hərəkatı liderlərinin nəzarəti itirməsinin gözlənilən nəticəsi olaraq Misirdə beş yüzdən artıq adam dünya “demokratlarının” susqunluğu müşayətində dar ağacına sürüklənməyi gözləyir.

Bundan narahat olan müsəlmanlar, edamların qarşısını almaq üçün bir mübarizə metodu seçdilər və hal hazırda İnternetdə bunun geniş təbliği aparılır.
Onlar, edama qarşı olan adamlardan elektron imza toplamağa və bu şəkildə məhkumları qurtarmağa çalışırlar. Hərbi xuntanın indiyə qədər etdiklərindən xəbərdar olan hər ağıl sahibi, bu metodun faydasızlığından, hətta qarşı tərəf üçün gülüş səbəbi olduğundan şübhə etməz!

Müsəlmanların bu sahədəki mütəmadi uğursuzluqlarını gördükdən sonra, mövzu haqqında qısa bir məqalə qələmə alaraq, məsələyə ana xətlərilə toxunmaq, onları mübarizənin təməl məsələlərilə tanış etmək istədim. Bizi, - nəzəri də olsa - müsəlmanların bir problemini daha çözməyə müvəffəq edən Allaha şükürlər olsun.

 


Ən çətin yıxılan büt, insanın öz nəfsidir...

#2 Usuli

Usuli

    Forum Əhli

  • Moderators
  • 1.265 ismarıc
  • Məzhəb:Hənəfi

Yerləşdirilmə tarixi: 12 aprel 2014 - 16:55

Ümumilikdə mübarizə metodları haqqında

 

Bu barədə ümumi fikir əmələ gəlməsi üçün, yaşadığımız dünyanın müxtəlif sahələrindən misallar təqdim etmək istəyirəm.

 

Həbsxanalar. Zülmün ən yayğın olduğu yerlərdən olan həbsxanalar mübarizə metodlarının genişliyilə tanınır. Bunlardan ən məşhurları aclıq aksiyası, damarların kontrollu kəsilməsi, ümumi qiyam, oradakı qeyri qanuni halların video formasında KİV-lərə sızdırılması - İctimailəşdirilməsi, insan haqları quruluşlarına şikayətlər və s.

 

Yol polisi, Nəqliyyat Departamenti örnəyi. Bu qurumların özbaşınalığıyla mübarizə metodlarının ən yayğını, rüşvət, fiziki təzyiq kimi halların video qeydə alınaraq KİV - lərdə, sosial şəbəkələrdə ictimailəşdirilməsidir. Bir çox hallarda bu cür bir mübarizə təsirli olur. Bunun ən son örnəyi yollarda qurulan qanunsuz radarlar haqda videonun sosial şəbəkələrdə yayılmasından sonra DYP - nin özünü qisməndə olsa yığışdırması oldu.

 

İşçi işverən münasibəti örnəyi. Adətən haqları tapdalanan işçilərin öz hüquqlarını müdafiə üçün ən yayğın mübarizə metodu - toplu halda iş buraxaraq, iş verəni ciddi zərərə məruz qoymaqdır. Bu kimi şeylər iş ücrətinin artırılması, iş saatının azaldılması, Tibbi Sığortasının əldə edilməsi üçün adətən uğurlu olur.

 

Femen – qadın "haqları" müdafiə təşkilatı örnəyi. Adətən cinsi istismar, qadına şiddət kimi qadın hüquqlarıyla bağlı hədəflərə sahib olan bu təşkilatın özünə məxsus bir mübarizə metodu vardır. Onlar müəyyən problemə diqqət çəkmək üçün hökumət binaları önündə, mətbuat konfranslarında jurnalistlər qarşısında soyunurlar.

 

Avtomobil park örnəyi. Rusiyada avtomobili yanlış yerə park edərək insanlara mane olanlara qarşı qurulmuş “Stop Xam – Tərbiyəsizlərə Dur Deyək” adlı bir layihə mövcuddur. Onlar, yanlış park edən və bunda dirənən kimsələrin avtomobilinin ön şüşəsinə “mən hamıya tüpürürəm, hara istəsəm ora park edirəm” məzmunlu kağızlar yapışdıraraq bu problemlə özünə məxsus şəkildə mübarizə edirlər.

 

Pedofiliyayla mübarizə örnəyi. Pedofiliyanın çox yayğın olduğu Rusiyada uşaqların cinsi istismarıyla mübarizə aparan bir təşkilat, internet üzərindən uşaqbazları görüşə çağıraraq, tələyə salır və bütün bu prosesi video qeydə aldıqdan sonra internetdə paylaşaraq, caninin toplumda tanınıb sıxışdırılmasını təmin edirlər. Bu metod digər uşaqbazlarında bu yoldan qismən çəkinməsinə səbəb olur. “Narkotiksiz Şəhər” layihəsidə bunun uğurlu bir örnəyidir.

 

Nəqliyyatdakı sıxıntılarla mübarizə örnəyi. Məsələn Türkiyədə gözlədiyiniz ictimai nəqliyyat gec gəlir, isti havada sürücülər sərinlədicini açmırlar, nəqliyyatı təhlükəli şəkildə idarə edirlərsə, bunu internet və ya telefon üzərindən “Beyaz Masa” adlı müvafiq quruma şikayət edə bilərsiniz. Bir neçə xəbərdarlıqdan sonra, cəzalandırılan, daha sonra işdən çıxarılan sürücülərə qarşı təsirli bir mübarizə metodudur. Alıcı hüquqlarının tapdalanmasına qarşı mübarizə idarəsinə şikayət edilməsi də bənzəri bir metoddur. Ancaq insanların bir çoxu bu kimi fərdi mübarizə metodlarından belə xəbərsizdirlər.

 

Uyğunsuz reklamlarla mübarizə örnəyi. Bir çox ölkədə, bölgənizdəki açıq saçıq reklamdan narahat olmanız halında, bundan qurtula bilərsiniz. Bunun üçün lazımi sayda imza toplayaraq bölgə bələdiyyəsinə müraciət etməniz yetərlidir. Reallıqda rəsmlərin üzərini boyayaraq, reklam sahiblərini bezdirib, bölgədən çıxarma örnəyidə işə yarayır.

 

Hökumətlə mübarizə örnəyi. Müasir dünyada hökumətlərin devrilməsi hərbi çevrilişlər, demokratik seçkilər, kütləvi nümayişlər, iğtişaşlar nəticəsində toplum üzərində kontrolu itirmə kimi çox saylı vasitələrlə həyata keçirilir.

 

Əlbətdə ki, bu metodlar saymaqla bitməz. Bəzilərindən söz etməkdə məqsədim metodların rəngarəngliyinə diqqət çəkib, onlar haqqında tablonun əmələ gəlməsinə yardımçı olmaqdır.
 


Ən çətin yıxılan büt, insanın öz nəfsidir...

#3 Usuli

Usuli

    Forum Əhli

  • Moderators
  • 1.265 ismarıc
  • Məzhəb:Hənəfi

Yerləşdirilmə tarixi: 12 aprel 2014 - 17:00

İslamda mübarizə metodu örnəkləri

 

Təməllərindən biri mübarizə/mücadilə olan Dinimizində örnək təşkil edəcək mübarizə üsulları vardır. Onlardan bir qismi Peyğəmbər zamanında istifadə edilmişdir.

Məsələn səhabələr tərəfindən İslami şüarları açıqlamaq, onlara diqqət cəlb etmək məqsədilə Məkkədə təşkil edilən mitinq, Mədinədə Yəhudi və başqa önəmli liderlərin sui qəsdlə öldürülmələri, kafirlərə qarşı fiziki savaşlar, iç düşmənlərin etibarsızlaşdırılması üçün aparılan informasiya müharibələri, Cihaddan qalanlarla əlaqənin kəsilməsi, bəzilərinin salamının alınmaması, cənazə namazlarının qılınmaması, hədiyyələrinin geri çevrilməsi və başqa metodları örnək verə bilərik.

Eyni zamanda İslam tarixi, bir çoxunun daha öncə İslam Dünyasında tətbiq edilmədiyi, yeni formalaşmış müxtəlif mübarizə metodlarıyla zəngindir. Ölkədəki özbaşınalıqlara qarşı Xəlifələrin sarayları önündə keçirilən nümayişlər, şərab satanların avadanlıqlarının sındırılması, alimlərin hökumət qərarlarına itaətsizliyə dəvət edən fətvalar verməsi, dövlətin onlara verdiyi vəzifələri rədd etmələri, müəyyən adamların arxasında namaz qılınmaması, xəstəykən ziyarət edilməmələri, cənazələrində iştirak edilməməsi, Haccac, Yezid kimi zalımların zamanındakı silahlı qiyamlar bunların örnəkləridir.

Bir sözlə İslam Tarixi çox sayda müxtəlif mübarizə metodlarına səhnə olmuşdur.
 


Ən çətin yıxılan büt, insanın öz nəfsidir...

#4 Usuli

Usuli

    Forum Əhli

  • Moderators
  • 1.265 ismarıc
  • Məzhəb:Hənəfi

Yerləşdirilmə tarixi: 12 aprel 2014 - 17:14

Metodların təsnifi

 

Məsələnin daha gözəl anlaşılması üçün mübarizə üsullarını cürbəcür dəyərlərə görə müxtəlif şəkillərdə təsnif etmək mümkündür:

 

Hədəfinə görə. Hədəfə görə metodlar müxtəlifdir. Silahlı qiyam kimi metodlar, hökumətlə olan problemin birbaşa həllini hədəflərkən, xırda çaplı dinc nümayişlər problemə diqqət cəlb edib, hökumət tərəfindən həllini hədəfləyir.
Bəzən isə bu cür nümayişlər, imza toplamalar, sadəcə duyarsız olmadığımızı, əlimizdən heçnə gəlməsədə, bundan narahat olduğumuzu göstərmə hədəfinə xidmət edir.

Bütün hallarda metodun hədəfi doğru anlaşılmalıdır. Hədəf doğru anlaşılmazsa müsəlmanlar günümüzdə olduğu kimi "duyarlılıq nümayişini", problem çözümü kimi anlayıb mübarizədən məğlub çıxarlar!

 

İslama uyğunluğa görə. İçərisində İslamın qadağan etdiyi elementlər olub olmaması baxımından metodları İslami və qeyri İslami olaraq bölə bilərik.

 

Dünyəvi hüquqa uyğunluq baxımından. Məsələn bölgənizdəki açıq saçıq reklamın qaldırılması üçün imza toplamanız hüquqi olduğu halda, bu reklamları boyamanız qeyri hüquqidir və bu halda, mübarizəniz üçün müəyyən bədəllər ödəməyə hazır olmalısınız.

 

Təşkilata ehtiyacı olma baxımından. Məsələn yuxarıda zikr etdiyim nəqliyyat örnəyində olduğu kimi, bəzi mübarizə metodları fərdi şəkildə həyata keçirilə bilir. Ancaq bir çox mübarizə metodu effektiv olması üçün, liderə və təşkilatlanmağa möhtacdır.

 

Effektivlik yönündən. Bəzi metodlar effektivkən, bəziləri mübarizə baxımından mütləq olaraq heç bir şey qazandırmaz. Yaxud cüzi faydalar təmin edər.

 


Ən çətin yıxılan büt, insanın öz nəfsidir...

#5 Usuli

Usuli

    Forum Əhli

  • Moderators
  • 1.265 ismarıc
  • Məzhəb:Hənəfi

Yerləşdirilmə tarixi: 12 aprel 2014 - 17:32

Metodların İslamiliyi məsələsi

 

Kafirlərin mübarizə metodları haqda danışdıq, Müsəlmanların metodlarından örnəklər verdik.

Bütün bunlardan sonra ortaya çox önəmli suallar çıxır: Müsəlmanlar bu metodların hansından istifadə edə bilər? Bir metodun “İslami Metod” olması üçün daha öncə müsəlmanlar tərəfindən istifadəsi şərtdirmi? Bir metodun istifadə edilə bilməsi üçün hansı şərtlərə baxılır?

Bu mövzuda vardığım qənaət, Dinin mahiyyətini anlamış kimsənin qətiyyən qarşı çıxmayacağı bir qənaətdir: Metodlar özləri etibarıyla İslami və ya küfri olmurlar! Bir metodun qadağan edilməsi üçün tərkib hissələrindən birinin İslam tərəfindən haram qəbul edilmiş olması lazımdır.

Məsələn biz, Femenin çılpaq mübarizə metodunun qadağan olduğunu, çılpaqlığın haram olmasına əsasən deyə bilərik. Dolayısıyla əksi isbat edilmədikcə mübarizə metodları digər şeylər kimi əsl etibarıyla halaldır. Zamanın tələblərinə uyğun olaraq dinamik bir şəkildə inkişaf etdirilməlidir. 

Hər hansı bir metodun daha öncə Müsəlmanlar tərəfindən istifadə edilməməsi, onun qeyri İslamiliyinə, qadağan olmasına heç cür dəlalət etməz! Eynilə bidət məsələsində olduğu kimi, bir şeyin qadağan olması üçün sonradan ortaya çıxmasıyla yanaşı, İslamın prinsiplərinə zidd olmasıda lazımdır.

Allah Rəsulu risalətdən öncə, ortada “İslami mübarizə” metodları yoxkən “Hilful Fudul” adlı insan haqları müdafiəsi təşkilatına qoşulmuş, risalətdən sonra da bu əhdinə sadiq qaldığını bildirmişdir. Mədinə müdafiəsində istifadə edilən xəndək qazma təcrübəsi, Taif şəhərinə hücumda istifadə edilən mancanaq,o zaman kafir olan Farslardan alınmışdı.

Məkkədə iqtisadi boykota məruz qalan müsəlmanlar, bir neçə il sonra Bədr savaşı öncəsi su quyuları ətrafındakı stratejik mövqeyi tutaraq eyni boykotu kafirlərin özünə tətbiq etdilər.

Hudeybiyyə sülhündə qoyulmuş ekstradisiya şərti, Müsəlmanların yeni bir mübarizə metodu olan partizan savaşını kəşf etmələrinə səbəb oldu və tamamən müstəqil şəkildə alınmış bu qərar, Allahın elçisi tərəfindən “bidət metod” olaraq vəsf edilib qınanmadı…

Müsəlmanlara yamanmış və hər kəsin istədiyi şəkildə anlam verdiyi “Nəbəvi Metod”, əslində haram elementlər daşımayan hər metoddur. Xüsusi universal bir “Nəbəvi Metod” olsaydı Allah Rəsulu farslardan xəndək və mancanaq üsulunu almaz, partizan müharibəsi aparan Səhabələri bu universal metoda qarşı çıxmaqla ittiham edərdi.
Metodlar mübarizənin silahlarıdır. Silahlar isə, savaş şərtlərinə uyğun olaraq təkmilləşdirilməlidir. Silahın İslami və ya küfri variantı olmaz!

Mübarizədə yeni metodları sırf İslamda örnəyi olmadığı üçün qadağan etmək, səfərlərdə eyni gərəkçəylə müasir nəqliyyat vasitələrini qadağan etmək, məişətdə örnəyi yoxdur deyə qeyri müsəlman mənşəli yeməkləri qadağan etmək, savaşda örnəyi yoxdur deyə müasir silahları qadağan etmək, örnəyi olmadığı üçün internet və televiziya vasitəsilə İslami təbliği qadağan etmək qədər absurd və gülüncdür.

Bu traji komediyada baş rol oyunçuları, səhabələr etməyib deyə mitinqləri Janna Darkın sünnəti sayan sələfi “imam”larıdır...
 


Ən çətin yıxılan büt, insanın öz nəfsidir...

#6 Usuli

Usuli

    Forum Əhli

  • Moderators
  • 1.265 ismarıc
  • Məzhəb:Hənəfi

Yerləşdirilmə tarixi: 12 aprel 2014 - 17:57

Niyə Müsəlmanlar bu sahədə uğur qazana bilmirlər?

 

Bəli müsəlmanlar bir çox sahədəki mübarizələrində uğur qazana bilmirlər və bunun təməl səbəblərindən biri, metodlardan hansının effektiv, hansının qeyri effektiv olduğunu seçə bilməmələri, sadəcə İslam Tarixində örnəyi olan metodlarla kifayətlənmələridir.

Bunu deyərkən avam kütləni qəsd etmirəm. Əksinə müsəlman liderlərin, şeyxlərin bir çoxu içində yaşadıqları dünyanın reallıqlarından, Dünyəvi bilgi və təcrübələrdən xəbərsiz, nağıllar aləmində həyat sürürlər və “mübarizə metodlarında” Don Kixotun müqəllidləridirlər...

Məşhur bir təhqiqatçının dediyi kimi, müsəlmanların problem çözmə şəkli aşağıdakı şəkildədir: Ortaya bir problem çıxar, hamı çarəsiz halda şeyxin gəlməsini gözləyər. Nəhayət tutduğu məqamın işğalçısı olan şeyx gələr. Mahiyyətini belə anlamadan əzbərlədiyi, “gələcək İslamındır”, “zəfər müsəlmanlarındır” kimi özünün belə şübhə etdiyi şüarlar səsləndirərək, xəstələrə çox sağlam olduqları, müalicəyə ehtiyac duymadıqları fikrini aşılayar. Nəhayət problem şeyxə ərz edilər... Şeyx, problemin nə olduğunu anlamadan, standart bir cümləylə “dua edərəm” deyib, mənasız həyatını tükətmək üçün lüks yuvasına dönər...

Liderlərimizin bir çox mübarizə üsuluna nəzər salsaq, ən yaxşı halda 1 Aprel zarafatı olaraq uyğunluğu müzakirə edilə bilər...

Məsələn İstanbulda dünyanın ən çox saylı camaatlarının biri tərəfindən təşkil edilən tədbirdə, camaatın “elmdə” irəliləmiş öndərlərindən biri, dünyadakı küfrlə mübarizə üçün çox orijinal bir təklif verdi: Kağız qələm çıxarın, indi sizə deyəcəyim duanı yazın. Əgər bunu oxusanız ənyaxın zamanda bütün kafirlər İslamı qəbul edəcək və yer üzü ancaq müsəlmanlardan ibarət olacaq. O anda kağız qələmini çıxarmayan tək insan olmamın dərin “suçluluğunu” yaşadım...

Qarşı tərəfdə isə kafirlər var. Dünyanın "ilahları" olmaq üçün gecə gündüz çalışıb, planlar çizirlər. Başqalarının əlindəki sərvətləri oğurlamaq üçün teoriyalar hazırlayarlar. Ölkələri təyziq altında tutmaq üçün onları qarışdırma üsullarını və zəifliklərini öyrənən xüsusi stratejik araşdırma mərkəzləri, institutlar qurarlar, bütün dünyadakı mübarizə metodlarını yaxından təqib və təhlil edib, nəticələr çıxararlar...

Bizlər, silahla devrilmiş prezidenti imzayla qurtarmağa çalışarkən, onlar bizim ölkələri kölələşdirib, talan etmək üçün öz stratejik mərkəzlərində yeni metodlar ortaya çıxarır, gecə gündüz durmadan çalışan kadrlar yetişdirir, boynumuzdakı köləlik boyunduruğunu daha da qalınlaşdırırlar...
 


Ən çətin yıxılan büt, insanın öz nəfsidir...

#7 Usuli

Usuli

    Forum Əhli

  • Moderators
  • 1.265 ismarıc
  • Məzhəb:Hənəfi

Yerləşdirilmə tarixi: 12 aprel 2014 - 18:12

Metodlarda diqqət ediləcək təməl qaydalar – nə etməliyik?

 

Mübarizənin əmr edildiyi Müsəlmanlar, bu mübarizənin dəyişkən metodlarını daimi şəkildə təqib edib, öyrənmək məcburiyyətindədirlər. Bu metodları öyrənmədən mübarizəyə girişənin halı, silah və hərbi taktikalar haqqında yetərli bilgisi olmadan Cihad edənin halına bənzəyir.

Təbii ki, bu vəzifə öncəliklə toplumu arxasınca aparan liderlərə düşür. Onların hazırkı halı, avtomobil idarəsini bilmədən avtobusla adam daşımaqdan ibarətdir...

Bu metodları öyrənmək üçün ətrafdakı hadisələri ayıq başla təhlil etmək, bu barədə yazarın kimliyindən asılı olamayaraq ədəbiyyat və bu kimi vasitələrdən faydalanmaq, başqa ölkələrin, topluluqların təcrübələrini dəyərləndirmək, yeni metodları təcrübə etmək lazımdır. Hətta mən deyərdim ki, “İslami Hərəkat” adlı yeni bir fənn təsis edilib, metodlar məsələsi orada geniş müzakirə olunmalıdır.

Mən mübarizə metodları haqqında təsbit etdiyim ana prinsipləri bu cür sıralayardım:

 

Metodun İslama uyğunluğu. Hər mübarizə metodunda diqqət edilməsi lüzumlu olan ilk xüsus sözsüz ki, İslama uyğunluq məsələsidir. Tərkibi İslami qadağalar altına düşən metodlardan istifadə edilmədiyi kimi, tərkibi İslamın prinsiplərinə zidd olmayan hər metod dəyərləndirilməlidir!

 

Mübarizə üsullarının dəyişkənliyi. Anlaşılması gərəkli olan önəmli prinsiplərdən biri budur: Mübarizə üsulları zaman, məkana, qüvvələr nisbətinə, milli mentalitetin, dini dəyərlərin təsirində qalması nisbətində dəyişkəndir. Bir hədəfə çatmaq üçün effektiv olan metod, başqa hədəfə çatmaq üçün bu özəlliyə sahib olmaya bilər. Məsələn İsveçdə seçkilərə qatılaraq dövlət idarəsində yer almaq real olduğu halda, Azərbaycan kimi mandatların kolxoz bazarında satıldığı yerlərdə bu üsul gülünc olar. Siyasi məhbusun aclıq aksiyası effektiv olduğu halda, qeyri siyasi məhbusun aclıq aksiyası ona ancaq mədə xəstəliyi qazandırar. Şəhərlər arası səfərlərdə namaz üçün durmayan sürücüyə etiraz heç bir təsir etməzkən, ölkə müsəlmanlarının təşkilatlanıb, uyumsuz firmaları iqtisadi boykota uğratması effektiv olar. Bir qurumda kütləvi iş buraxma maaşların artırılmasına səbəb olarkən, eyni metod başqa firmada əlinizdəki maaşdan da məhrum olmanızla nəticələnə bilər. Bu səbəblə, “hər dərdə dəva olan” standart metodlardan çəkinmək, hansı metodun harada istifadə ediləcəyini düzgün qiymətləndirmək lazımdır!

 

Bu sahədəki təcrübələrin paylaşılması və ibrət almaq. Hər şeyi təcrübə etmək üçün insan ömrü yetərli deyil. Bu səbəblə həyatımızda istifadə etdiyimiz bir çox şey, başqalarının təcrübələrindən ibarətdir. Bizlər həm öz mübarizə təcrübəmizi başqa müsəlmanlarla paylaşmalı, həm də başqalarının təcrübələrini analiz edib, doğru nəticələrə vara bilməliyik.

Məsələn bir müddət öncə Bakıdakı mağazadan mal aldıqdan sonra onun problemli olduğunu görən bir qardaşımız, malı geri qaytarmaq istəsə də, mağazada ümumiyyətlə ona diqqət göstərmədilər. Qardaş hadisə haqda istehlakçı hüquqlarını qoruyan quruma telefonla şikayət etdi. Qısa bir müddət sonra proses onun istəyinin şəxsən mağaza müdurü tərəfindən təmin edilib, bu hadisə üçün üzr istənməsilə bitdi. Ancaq belə hallar məşhur olmadığı üçün toplum tərəfindən istifadə edilə bilmir. Əgər daha öncə müvəffəq olduğunuz bir təcrübəni paylaşsanız, başqaları da bundan faydalanar. Bu cür iş yeri sahibləri, dövlət qurumu məmurları adətən effektiv mübarizə metodlarını qeyri effektiv olaraq göstərmək, gizlətməyə çalışmaq, mənasız olduğu obrazı yaratmaq üçün əllərindən gələni edərlər. Faktlara güvənin!

 

Metodun effektivliyi. Bir metoda baş vurulmadan öncə gətirisi-götürüsü diqqətli bir şəkildə hesablanmalıdır. Mübarizəni “nəsə etmək” naminə etməməliyik!

Əgər Sisinin despot olduğunu isbat etmək, bizim üçün nümayişlərdə yüzlərcə insanın öldürülməsi bahasına başa gəlirsə, effektivlik anlayışımızı dönə dönə gözdən keçirməliyik.

 

Təşkilatlanmanın önəmini anlamaq. Mübarizə üsullarının böyük əksəriyyəti ancaq toplu halda reallaşdırıla bilər. Bunun üçün isə doğru təşkilatlanma, layiqli liderlərə itaət mexanizminin formalaşması, “parçala hökm et” şüarına qarşılıq “birləş qurtul” siyasətinin canlara hopması lazımdır.

İctimailəşdirmənin gücünün fərqinə varmaq. Mübarizə elminin təməl prinsipi olaraq, müstəsna hallar xaric, istənilən problemin və ya haqsızlığın ictimailəşdirilməsi haqsız tərəf üzərində dərin psixoloji təzyiq buraxır. Hesabı avtomatik olaraq 1:0 olaraq məzlumun xeyrinə edir. Hər birimiz ictimailəşdirilərək həllini tapmış onlarca məsələyə şahid olmuşuq. Lakin, bu problemlər ictimailəşdirilməsə idi, həllini tapmazdı...

 

Bu məqaləmin məqsədi hansısa metodun effektivliyini və ya caizliyini müzakirə etmək deyil, ümumi qaydalar qoymaq, metodlara yanaşma tərzini izah etmək, Müsəlmanların bu barədə qismən də olsa aydınlanmasına vəsilə olmaqdır.
Beləcə Müsəlmanlar nəsə etmək naminə çalışmaz, effektiv metodları öyrənib onlarla öz məqsədlərinə çatar, qeyri effektiv üsullarla enerji tükətməzlər... Allah nəsib edərsə forumumuzda müxtəlif mübarizə üsulları müzakirə ediləcək.

Həmd aləmlərin Rəbbinə məxsusdur…
 


Ən çətin yıxılan büt, insanın öz nəfsidir...




Bu mövzunu oxuyan istifadəçi sayı: 0

0 İstifadəçi, 0 Qonaq, 0 Anonim