Перейти к содержимому

Forumun Hədəfi

Hədəfi müəyyən olmadan görülən işlər, istənilən faydanı verməzlər. Çünki hədəf, bizə təqib edəcəyimiz yolu, istifadə edəcəyimiz vasitələri göstərir.
Hikmət əhlindən biri bu prinsipi qısa olaraq belə ifadə etmişdir: "Mənzili bəlli olmayan gəmiyə heç bir külək fayda verməz".
Təbii ki, bizim də bu forumu qurmaqda müəyyən hədəflərimiz var. O hədəf aydın ifadə edildiyi zaman, forumda açılan mövzular və müzakirələr də hədəfə uyğun olmalı, xidmət etməlidir.

Forumumuzun ümumi hədəfi, müsəlmanlara faydalı məlumatlar verib, onları zərərli fikirlərdən çəkindirməkdir. Lakin, bunu ümumi şəkildə eləmək forum miqyasında təbii ki mümkün deyildir. Forumda bütün fiqhi məsələlər ələ alına bilməz, əqidənin hər nöqtəsinə toxunula bilməz. Həmçinin bütün zəlalət firqələrinə cavablar verilə bilməz.
Ən azından forumun texniki və bizim fiziki, elmi imkanlarımız buna uyğun deyil. Biz bu hədəfi biraz daha daraldaraq onu "aktuallıqla" məhdudlaşdırmaq istəyirik.
Yəni forumun məqsədi bütün faydaları göstərib, zərərlərdən çəkindirmək deyil, real olaraq içində olduğumuz vəziyyətdə ən aktual, ən önəmli faydalara öncəliklərə işarə edib, hazırda ən çox zərər verən fikirlərdən çəkindirməkdir.
Bir sözlə forum, sadəcə real və lokal problemlərin həllini qarşısına məqsəd qoymuşdur. Bizlər bu forum vasitəsilə toplumdakı ən ciddi xəstəlikləri müalicəyə çalışacaq, firqələrə cavablar yazmağa və problemlərə toxunmağa təhlükə dərəcəsinə görə zaman ayıracağıq.
Ölkəmizdəki müsəlmanlar təkfir bəlasında boğularkən, artıq tarix olmuş "Quran məxluqdurmu?", "Haram ruzidirmi?" kimi məsələləri ön plana çıxarmaq, infarkt keçirən adamın ürəyiylə deyil, dırnağındakı zədəylə məğul olmaq qədər "məntiqli"dir...
Forumun hədəfi: hər məsələylə deyil, önəm və təhlükə baxımından ən kritik olanlarla məşğul olmaqdır.
Buna başqa sözlə "ən önəmli olanların önə alınması" da deyə bilərik.

Dolayısıyla forumda açılan mövzular və müzakirələrin bu hədəfə uyğun olması lazımdır. İstifadəçilərdən ricamız yazılarının təyin edilmiş hədəfə nə qədər xidmət etdiyinə diqqət etmələridir.
İslam dünyası "hədəfsizlik", "ən önəmli olanları önə almama" və "əzbərçiliyin" zərərlərindən nəsibini artıq yetərincə almışdır.